काठमाडौ । पत्रकार लक्ष्मण दर्नालले यही मङ्सिर २८ गते हुने नेपाल पत्रकार महासङ्घको केन्द्रिय सदस्य (दलित) मा उम्मेदवारी दिनुभएको छ ।
उहाँको उम्मेदवारी केन्द्रिय सदस्य (दलित) क्रम सङ्ख्या ३ नं मा रहेको छ ।
पत्रकार दर्नालले अभिव्यक्ति तथा पूर्ण प्रेस स्वतन्त्रता, व्यावसायिक र स्वतन्त्र पत्रकारिता, श्रमजीवीको पेशागत हकहित र सुरक्षा र समावेशी पत्रकारिताको निम्ति आफूलाई मतदान गरी विजयी बनाउन देशैभरीका पत्रकार महासङ्घका सदस्यहरुसँग अनुरोध गर्नुभएको छ ।
विगत दुई दशकदेखि पत्रकारितामा सक्रिय दर्नाल हाल १४ बर्षदेखि ‘गोरखापत्र’ दैनिक पत्रिकामा कार्यरत हुनुहुन्छ । २०६० सालदेखि पत्रकारिता क्षेत्रमा निरन्तर सक्रिय दर्नालले सुरुमा रेडियोमा ‘कट्वाल’ कार्यक्रम सञ्चालन गर्नुभएको थियो । पत्रकारितामा स्नातकोत्तर ‘मास्टर डिग्री’ गर्नुभएका दर्नालद्धारा लिखित ‘दलित समुदायको राजनीतिक प्रतिनिधित्व २००७२०८० सत्ता सङ्घर्षको इतिहास’ चर्चित छ ।
राष्ट्रिय दलित पत्रकार सङ्घ नेपालका महासचिव समेत रहनुभएका पत्रकार दर्नालले लेख्नुभएको ‘संविधानमा दलित मुद्दा’, ‘जातीय भेदभाव तथा छुवाछूत घटनामा मिडियाको दृष्टिकोण’, ‘सिंहदरवार गेट कब्जाको कमाण्डर उमादेवी वादी’ र ‘नेपालमा दलित महिलामाथि हुने हिंसाको अवस्था’ लगायत दर्जनभन्दा बढी अनुसन्धानमूलक पुस्तक बजारमा उपलब्ध छन् ।
दुई दशकदेखि विशेष गरी समावेशिताको सवालमा कलम चलाउँदै आउनुभएका दर्नाल राष्ट्रिय दलित पत्रकार सङ्घ नेपालको संस्थापकसमेत हुनुहुन्छ ।
