काठमाडौं । आर्थिक विवादमा मुछिएका प्रहरी कार्यालय सप्तरीका प्रहरी उपरीक्षक (एसपी) ढकेन्द्र खतिवडालाई काज सरुवा गरिएको छ ।
उनलाई बागमती प्रदेश प्रहरी कार्यालयमा सरुवा गर्दै उनको स्थानमा एसपी गौतम केसीलाई काज खटाइएको छ ।
सप्तरी प्रहरी प्रमुख हुँदा आर्थिक विषयमा आचरण विपरित कार्य गरेको गुनासो परेपछि उनलाई छानबिनका लागि त्यहाँबाट हटाइएको प्रहरी प्रधान कार्यालयले जनाएको छ ।
उनको विषयमा उजुरी परेपछि छानबिनका लागि नेपाल प्रहरी प्रदेश कार्यालय वीरगन्जका एसएसपी शान्तिराज कोइरालाको नेतृत्वमा तीन सदस्यीय समिति गठन भएको थियो ।
सो समितिले दिएको प्रतिवेदनका आधारमा उनलाई सरुवा गरिएको कार्यालय स्रोतले जनाएको छ ।
