काठमाडौं । निर्वाचन आयोगले बहालवाला जनप्रतिनिधिहरूले आगामी निर्वाचनमा उम्मेदवारी दिँदा पदबाट पहिले नै राजीनामा दिनु नपर्ने स्पष्ट पारेको छ। तर, उम्मेदवारी मनोनयन दर्ता हुनासाथ उनीहरूको पद भने स्वतः खारेज हुनेछ।
आयोगले जारी गरेको सूचना अनुसार संघीय संसद्, प्रदेश सभा वा स्थानीय तह (गाउँ र नगर सभा) मा बहाल रहेका व्यक्तिहरूले प्रतिनिधिसभा वा प्रदेश सभा सदस्यका लागि मनोनयन दर्ता गरेको क्षणबाटै पुरानो पद रिक्त भएको मानिनेछ। यसअघि उम्मेदवारी दिनुअघि नै राजीनामा दिनुपर्ने कि नपर्ने भन्ने अन्योललाई आयोगको यो निर्णयले चिरेको छ।
आयोगका अनुसार यो नियम प्रत्यक्ष र समानुपातिक दुवै प्रणालीमा लागू हुनेछ। समानुपातिकतर्फको बन्दसूचीमा नाम समावेश भई दर्ता हुनासाथ पनि सम्बन्धित जनप्रतिनिधिको साविकको पद स्वतः गुम्नेछ। यदि कुनै जनप्रतिनिधिले उम्मेदवारी दर्ता गर्नुअघि नै राजीनामा दिएमा त्यो केवल औपचारिकता मात्र हुने आयोगको भनाइ छ।
