बुहारीमा प्रत्यारोपण गर्न निकालिएको सासूको मिर्गौला प्रत्यारोपण नगरी सर्जन अस्पतालबाट बाहिरिएपछि वीर अस्पताल दुई दिनयता तनावग्रस्त बनेको छ । डा. पारसमणि नेपाल र डा. अनिल श्रेष्ठ बिरामीका आफन्त र अस्पतालमा समेत जानकारी नगराई हिँडेपछि तनाव उत्पन्न भएको हो ।
गएको मंगलबार उनीहरू वीर अस्पतालबाट हिँडेका थिए । उनीहरू धादिङको गल्छी गाउँपालिका–२, कल्लेरीकी ३५ वर्षीया चमेली गैरेलाई उनकै ५८ वर्षीया सासूबाट मिर्गौला प्रत्यारोपण गर्न खटिएका थिए ।
तीन महिनायता विभिन्न परीक्षण गरी मंगलबार प्रत्यारोपणको ‘डेट फिक्स’ गरिएको थियो । तर, सो मिर्गौला प्रत्यारोपण गर्न नसकिने भन्दै सर्जनहरू अस्पतालबाट बाहिरिएका थिए । त्यसपछि बिरामीका आफन्तहरू आन्दोलित भएका हुन् ।
अस्पतालले यो घटनाको विषयमा छानबिन गर्न सर्जरी विभागका चिकित्सक डा. प्रविण श्रेष्ठको संयोजकत्वमा सात सदस्यीय समिति गठन गरेको छ । जसको सदस्यमा रेडियोलोजी विभागका प्रमुख डा. सरोज शर्मा, मेडिसिन विभागका प्रमुख डा. अशेष ढुंगाना, सीटीभीएस विभागका प्रमुख डा. दिनेश चापागाईं, एनेस्थेसिया विभागकी डा. ऋतु प्रधान, प्रमुख नर्सिङ प्रशासक संगीता श्रेष्ठ र शाखा अधिकृत सीताराम खड्का छन् ।
