स्विट्जरल्याण्डविरुद्ध फिफा विश्वकप २०२२ अन्तर्गत राउण्ड अफ १६ को जारी खेलमा रवाफिलो जित निकाल्दै पोर्चुगलले क्वार्टरफाईनलमा स्थान पक्का गरेको छ ।
कतारको लुसेल आईकोनिक स्टेडियममा बुधबार बिहान भएको राउण्ड अफ १६ अन्तर्गत स्विट्जरल्याण्डविरुद्धको खेलमा पोर्चुगलले स्विट्जरल्याण्डमाथि ६–१ गोल अन्तरको जित निकालेको हो ।
पोर्चुगलका लागि गोन्चालो रामोसले ह्याट्रिक गोल पुरा गर्दा रफायल गुरेरोले दुई र पेपेले एक गोल गरे ।
पोर्चुगलका लागि खेलको १७औं मिनटमा गोन्चालोले गोल गर्दै पोर्चुगलको खाता खोलेका थिए । गोन्चालो क्रिष्टियानो रोनाल्डोको स्थानमा शुरुवाती ११ मा खेलेका हुन् ।
खेलको ३३औं मिनटमा पेपेले सुन्दर हेडर गोल गर्दै पहिलो हाफमा पोर्चुगलको अग्रता दोब्बर बनाए ।
५१औं मिनटमा गोन्चालोले ब्यक्तिगत दोश्रो गोल गर्दै पोर्चुगललाई ३–० गोल अन्तरको अग्रता दिलाएका थिए ।
खेलको ५५औं मिनटमा रफायलले गोल गर्दै पोर्चुगललाई ४–० गोलको अन्तरमा पुर्याए ।
खेलको ५८औं मिनटमा म्यानुएल अकान्जीले गोल गर्दै स्विट्जरल्याण्डको गोल अन्तरलाई ४–१ मा घटाएका थिए ।
तर ६७औ मिनटमा गोन्चालोले ब्यक्तिगत ह्याट्रिक गोल गर्दै पोर्चुगललाई ५–१ गोल अन्तरको अग्रता दिलाएका थिए । यो जारी विश्वकपको पहिलो ह्याट्रिक गोल समेत हो ।
यसपछि खेलको अन्तिम मिनटमा रफायलले ब्यक्तिगत दोश्रो गोल गर्दै पोर्चुगललाई ६-१ गोल अन्तरको शानदार जित दिलाए ।
जित निकालेको पोर्चुगलले अब क्वार्टरफाईनलमा मोरक्कोसँग खेल्नेछ । मोरक्कोले मंगलबार राति भएको राउण्ड अफ १६ चरणको खेलमा २०१० को विश्वविजेता स्पेनलाई टाईब्रेकरमा ३–० गोल अन्तरले हराउँदै पहिलो पटक फिफा विश्वकपको क्वार्टरफाईनलमा स्थान बनाएको हो ।
