बारा । मोतिहारी–अम्लेखगञ्ज पेट्रोलियम पाइपलाइनको निर्माण कार्य तीव्र रुपमा भइरहेको छ ।
आगामी ६ महिनाभित्र पाइप लाइनबाट पेट्रोल आयात गर्ने तयारी नेपाल आयल निगम प्रादेशिक डिपो अम्लेखगञ्जको रहेको छ । दोस्रो चरण काम तीव्र गतिमा अगाडी बढेको निगम प्रादेशिक डिपो अम्लेखगञ्जका प्रमुख विनीतमणि उपाध्यायले जानकारी दिनुभयो ।
पेट्रोलियम पदार्थ भण्डारणको लागि ४ वटा ट्याङ्की निर्माणको काम तीव्र रुपमा भइरहेको छ । भारतीय आयल निगमसँगको सम्झौता अनुसार अगामी डिसेम्बरभित्र पूर्वाधार निर्माणको काम सम्पन्न गरी जनवरी २४ भित्र उद्घाटन गर्ने गरी काम भइरहेको निगमले जनाएको छ ।
पेट्रोलियम पाइपलाइनको दोस्रो चरणको पूर्वाधार निर्माणमा २ अर्ब १४ करोड लगानी हुने निगमले जनाएको छ । जसमध्ये ६० करोड भारतीय आयल कर्पोरेसनको र १ अर्ब ५४ करोड नेपाल आयल निगमको लगानी रहेको छ ।
नेपाल आयल निगम प्रादेशिक डिपो अम्लेखगञ्जका प्रमुख उपाध्यायले भवन निर्माणको काम ५० देखि ६० प्रतिशत र पेट्रोलियम पदार्थ भण्डारण गर्ने ट्याङ्की निर्माणको काम १५ प्रतिशत सम्पन्न भएको जानकारी दिनुभयो ।
