मोरङ- विराटनगर महानगरपालिका वडा नं. ३ मा रहेको न्यू पाथिभरा ड्राइभिङ स्कुलसँग नत मापदण्ड अनुसारको गाडी छ न मापदण्ड अनुसारको ट्रायल सेन्टर नै छ । यो ड्राइभिङ स्कुल यातायात व्यवस्था कार्यालयमा दर्ता समेत गरिएको छैन । तर पनि यसले ड्राइभिङ सिकाई भइरहेको छ ।
एउटा सटर भाडामा लिएर म्याद नाघेका पुराना गाडी ल्याएर ड्राइभिङ स्कुल संचालन गर्न थालेपछि कोशी प्रदेशमा ड्राइभिङ स्कुलहरुको अनुगमन गरिने भएको छ ।
आन्तरिक मामिला तथा कानुन मंत्रालयको यातायात व्यवस्था शाखाले दर्ता नभएको, दर्ता भएर पनि नविकरण नगरिएको र मापदण्ड नपुगेको ड्राइभिङ स्कुलहरुको अनुगमन गरी बन्द गराउने तयारी गरेकेा यातायात व्यवस्था शाखाका प्रमुख सुभाष कार्कीले जानकारी दिनुभयो ।
सवारी चालक प्रशिक्षण केन्द्र संचालन निर्देशिका २०७४ मा एउटा ड्राइभिङ स्कुल संचालन गर्न तीन वटा गाडी, तीन जना प्रशिक्षक, २ वटा मोटरसाइकल, दुइवटा स्कुटीका साथै मापदण्ड अनुसारको ट्रायल स्पोट अनिवार्य चाहिने व्यवस्था गरेको छ ।
अनुमति नै नलिएका ड्राइभिङ सेन्टरहरु संचालन हुँदा ठूलो लगानी गरिएका ड्राइभिङ स्कुलहरुलाई संचालन गर्न गाह्रो परेकोले यातायात व्यवस्था कार्यालयले अनुगमन गरी नियन्त्रण गर्नुपर्ने संचालकहरुको भनाई छ ।
आन्तरिक मामिला तथा कानुन मंत्रालयले दर्ता नै नगरिएको र मापदण्ड विपरित बग्रेल्ती ड्राइभिङ स्कुलहरु संचालन कार्य रोक्न कोशी प्रदेशका ८ वटै यातायात व्यवस्था कार्यालयहरु संग ड्राइभिङ स्कुलहरुको तथ्यांक माग गरेको छ ।
