नेकपा एमाले बझाङका उम्मेदवार ऐन महरले १५ घण्टाअघि आफ्नो फेसबुकमा लेखेका थिए, ‘ फ्री टिकट फ्री भिसा !माकुने कमरेडको समाजवादी कार्यदिशा ! ! हार्दिक शुभकामना ।’
यही विषयलाई लिएर आयोगले एकीकृत समाजवादीका अध्यक्ष माधव नेपाललाई बिहीबार स्पष्टीकरण सोध्यो । तर, संयोग महरले पनि पैसा वितरण गरेको उजुरी आयोगमा परेपछि बिहीबार नै स्पष्टीकरण सोधेको थियो ।
महरले जिल्लास्तरीय खेलकुद प्रतियोगिताका विजेतालाई पुरस्कार भन्दै ४१ हजार दिएको उजुरी परेपछि आयोगले स्पष्टीकरण सोधेको हो ।
‘तपाईंबाट पुरस्कार स्वरुप नगद वितरण भएकोबारे के कसो भएको हो ? यदि तपाईंबाट नगद वितरण कार्य भएको हो भने तपाईंलाई निर्वाचन आयोग ऐन, २०७३ को दफा २३ को उपदफा (३) र उपदफा (४) बमोजिम किन कारबाही हुनु नपर्ने हो ?,’ आयोगले सोधेको स्पष्टीकरणमा भनिएको छ ।
आयोगले २४ घण्टाभित्र निर्वाचन आयोग वा जिल्ला निर्वाचन कार्यालय बझाङमा प्राप्त हुने गरी स्पष्टीकरण पेस गर्न महरलाई भनेको छ ।
