जनकपुरधाम । आलु र प्याजमा लगाइएको भ्याट खारेजीको माग गर्दै जनकपुरधामका व्यापारीहरूले आज प्रदर्शन गरेका छन् । जनकपुरधामको पेठीया बजारबाट सुरु भएको व्यवसायीहरूको प्लेकार्ड तथा ब्यानरसहितको जुलुस नगरको परिक्रमा गर्दै जनक चौकमा आएर कोणसभामा परिणत भएकाे थियाे ।
आलु र प्याजको उत्पादन नहुँदै मूल्यमा वृद्धि हुने गरी लगाइएको भ्याटका कारणले आम उपभोक्ता तथा यसको व्यापार गर्ने व्यवसायी र सरकारको राजश्वमा कमी आएको भन्दै भ्याट खारेजीको माग व्यापारीहरूले गरेका छन् ।
आलु प्याज व्यवसायी सङ्घको अगुवाइमा भएको जुलुसलाई जनकपुरधाम उद्योग वाणिज्य सङ्घले समर्थन गरेको छ । जनकपुरधाम उद्योग वाणिज्य संघका अध्यक्ष जितेन्द्र महासेठले आलु र प्याजको पर्याप्त उत्पादन नहुँदै भ्याट लगाउने कामले आम उपभोक्ताहरू मारमा परेको बताउनुभयाे ।
उहाँले आलु तथा प्याजमा लगाइएको भ्याटका कारणले आम जनता थप करको बोझमा परेको र आम व्यवसायीहरूको व्यापार व्यवसायमा नकारात्मक असर परेको बताउनुभयो । अहिले आलुको मूल्य प्रतिकिलो ७० तथा प्याजको मूल्य ८० रुपैयाँ पुगेको छ ।
