राजेन्द्र महतो, सिरहा। सिरहामा १७ वर्षीया किशोरीको शंकास्पद मृत्युसम्बन्धी घटनामा छानबिन समिति गठन भएको छ ।
मधेस प्रहरी कार्यालयले एक विज्ञप्ति जारी गर्दै एसएसपी शान्ति राज कोइरालाको नेतृत्वमा पाँच सदस्य छानबिन समिति गठन भएको हो ।
समितिले आजै घटनास्थलमा पुगेर आवश्यक अनुसन्धान सुरु गरेको विज्ञप्तिमा उल्लेख गरिएको छ।
नवराजपुर गाउँपालिका वडा नम्बर–१ बस्ने १७ वर्षीया रिंकुकुमारी सदा माघ ३० मा मृत फेला परेकी थिइन् ।
घरमा झुन्डिएको अवस्थामा रिंकुकुमारी सदा मृत भेटिएकी हुन्।
घटना हुनुअघि उनीमाथि स्थानीय तीनजना युवक टिंकु मण्डल, चन्दन साह र रमेश मण्डलले सामूहिक बलात्कार गरेको, त्यसको पञ्चायत भएर मिलाउने प्रयास गरेको घटना बाहिर आएको छ ।
उनका आफन्त र परिवारले बलात्कृत भएपछि किशोरीले आत्महत्या गरेको दाबी गरेका छन् ।
आफन्तहरूले बलात्कारमा संलग्नलाई कारबाही गर्न माग गरेका छन् ।
