रुसी सेनाले युक्रेनको राजधानी किएभमा टेलिभिजन टावरमाथि आक्रमण गर्दा कम्तीमा पाँच जना मारिएका छन् । युक्रेनले यसलाई रुसकाे बर्बरता भनेकाे छ । युक्रेनको आपत्कालीन सेवासम्बन्धी निकायले टेलिभिजन टावरमाथि प्रहार हुँदा कम्तीमा पाँच जनाको मृत्यु भएको जानकारी दिएको दिँदै अरु पाँच जना घाइते भएका बताएकाे छ ।
आक्रमणपछि टेलिभिजनको प्रसारण रोकिएको छ । टेलिभिजनमा हमला भएपपछि युक्रेनी विदेश मन्त्रालयले ‘रुसी अपराधीहरू आफ्नो बर्बरता देखाउन कतै पनि नरोकिने गरेको’ जनाएको छ । सामाजिक सञ्जाल ट्वीटरमार्फत् मन्त्रालयले यस्तो प्रतिक्रिया जनाएको हो ।
राजधानी किएभलाई प्रमुख निशाना बनाएर रुसी फाैजले स्थल तथा हवाई आक्रमण गरिरहेकाे छ ।आक्रमणको निशानामा सर्वसाधारण नागरिक तथा विद्यालय, अस्पतालसहितका सार्वजनिक स्थलहरू परेका छन् । अब त रुसले सञ्चार संस्थाहरूलाई पनि आक्रमणको निशाना बनाएको हाे ।
यसअघि युक्रेनी राष्ट्रपति भोलोदिमिर जेलेन्स्कीले युरोपेली संसद्को विशेष बैठकलाई भिडियाे लिंकमार्फत सम्बोधन गर्दै युक्रेनलाई कसैले भंग गर्न नसक्ने बताएका थिए । उनले युक्रेनले रुसको आक्रमणको सबै क्षेत्रबाट प्रतिरोध गरिरहेको बताएका थिए ।
