हेटौँडामा हिजो अत्यन्तै क्रुर ढंगले शिक्षकले विद्यार्थीमाथि दुर्व्यवहार गरेका छन् । बागमती प्रदेशको राजधानी हेटौँडास्थित पुरानो शैक्षिक संस्था हेटौँडा क्याम्पसमा स्नातक तह दोस्रो बर्षको परिक्षा दिन पुगेकी दुई छात्रालाई भित्री वस्त्र मात्र होइन, महिनावारी हुँदा लगाइएको प्याडसमेत खोल्न लगाइएको पाइएको छ ।
त्यही घटनाले आज हेटौँडा क्याम्पसमा आज अकस्मात हुलदंगा भएको छ । हिजोको घटनाबारे सामाजिक सञ्जालहरुमा ब्यापक आलोचना भएपछि घटनासँग सम्बन्धित दुई छात्राका अभिभावक, क्याम्पस सञ्चालक समिति अध्यक्ष मुनु सिग्देल,क्याम्पस प्रमुख देवचन्द्र मानन्धर र सबै विद्यार्थी संगठनका नेताहरु बसेर घटनाको बिश्लेषण भइरहेको थियो ।
अकस्मात २ सय जनाको हाराहारीमा मकवानपुर बहुमुखी क्याम्पसबाट आएका विद्यार्थीले हेटौँडा क्याम्पसमा नाराबाजी सुरु गरे । त्रिभुवन विश्वविद्यालय अन्तर्गतको परिक्षामा मकवानपुर बहुमुखी क्याम्पसको परिक्षा केन्द्र हेटौँडा क्याम्पसमा पर्ने गर्दछ । दुर्व्यवहारमा परेका दुई छात्राहरु पनि मकवानपुर बहुमुखी क्याम्पसकै हुन् ।
पीडित विद्यार्थीले आफू महिनावारी भएको र ‘प्याड’ प्रयोग गरेको भन्दा समेत कर्मचारीले ‘प्याड’ मा समेत चिट हुन्छ भन्दै खोल्न लगाएको बताएका छन् । यस घटनालाई लिएर मकवानपुरमा क्रियाशील विद्यार्थी संगठनहरुले आपत्ति जनाएका छन् । दुर्व्यवहार गर्नेलाई कडा कारबाही गर्न उनीहरूको माग छ ।
हेटौँडा क्याम्पसका सहायक क्याम्पस प्रमुख देवीराम लामाले घटनाबारे आफूहरूको ध्यानाकर्षण भएको बताए । यसबारे अनुसन्धान गरी दोषीमाथि कडा कारबाही गरिने प्रतिबद्धता उनले व्यक्त गरेका छन् । आफुहरूले सर्वपक्षीय छलफल गरी दोषीको पहिचान गर्ने पनि उनले उल्लेख गरे ।
