काठमाडाैं । सुदूरपश्चिम प्रदेशमा चाडपर्व लक्षित सुरक्षाका लागि ११ हजार प्रहरी परिचालन गरिने भएको छ ।
प्रदेशका ९ वटै जिल्लामा चाडपर्व लक्षित सुरक्षा योजना अन्तर्गत ११ हजार प्रहरी परिचालन गरिन लागिएको हो ।
सुदूरपश्चिम प्रदेशका प्रहरी प्रमुख रविन्द्र केसीले चाडपर्व लक्षित सुरक्षा योजना तयार गरिएको बताउँदै हाल सुरक्षामा रहेका सात हजार प्रहरीसहित थप चार हजार प्रहरी चाडपर्वको समयमा परिचालन गरिने जानकारी दिए ।
दशै, तिहार र छठका लागि भारतबाट फर्किएका नागरिकको सुरक्षाका लागि पनि विशेष योजना तयार पारिएको छ । प्रदेश प्रहरीले चाडपर्व लक्षित सुरक्षा योजनामा सीमा सुरक्षा, चोरी–तस्करी, ठगी, लुटपाटको विषयमासमेत रणनीति तयार पारेको डीआईजी केसीले जानकारी दिए ।
प्रदेश प्रहरी प्रमुख केसीले चाडपर्व ढुक्कका साथ मनाउन आग्रह गरेका छन् ।
