प्युठान । शान्ति सुरक्षा, अपराध नियन्त्रण तथा कानुनी कार्यान्वयनमा उल्लेखनीय योगदान पुर्याउँदै आएका प्युठानका प्रहरी नायब उपरीक्षक (डिएसपी) दिपेश बस्याललाई जिल्ला प्रशासन कार्यालय, प्युठानले औपचारिक रूपमा सम्मान गरेको छ।
जिल्ला प्रशासन कार्यालयमा आयोजित विशेष कार्यक्रममा प्रमुख जिल्ला अधिकारी (सिडिओ) रमा आचार्य (सुवेदी) ले डिएसपी बस्याललाई प्रशंसा-पत्र प्रदान गर्दै उनको कार्यकुशलता, इमान्दारिता र समर्पणको उच्च मूल्याङ्कन गरिन्।
कार्यक्रममा सहायक प्रमुख जिल्ला अधिकारी, सुरक्षा निकायका प्रमुख, विभिन्न सरकारी कार्यालय प्रमुख, पत्रकार महासंघका प्रतिनिधि र संचारकर्मीहरूको उपस्थिति रहेको थियो।
बस्यालको नेतृत्वमा सुधारिएको शान्ति सुरक्षा अवस्था
डिएसपी बस्यालले जिल्लामा कानूनको प्रभावकारी कार्यान्वयन, मुद्दा फाँटमा देखिएको सुधार, अपराध अनुसन्धानमा सशक्तता, र नागरिकमैत्री सेवा प्रवाहमा नविनता ल्याएको स्थानीय बासिन्दाहरूको भनाइ छ।
उनको सक्रिय नेतृत्वका कारण चोरी, लागुऔषध कारोबार, घरेलु हिंसा लगायतका अपराधमा उल्लेखनीय गिरावट आएको बताइएको छ।
साथै, विपद् व्यवस्थापनदेखि मानव अधिकारको संरक्षणसम्मको कार्यमा उनले समन्वयात्मक भूमिका खेलेको भन्दै विभिन्न सरोकारवालाहरूले प्रशंसा व्यक्त गरेका छन्।
स्थानीय प्रशासनको सकारात्मक सन्देश
कार्यक्रममा प्रमुख जिल्ला अधिकारी आचार्यले भनिन्, “डिएसपी बस्यालको कार्यसम्पादन अनुकरणीय छ। यस्तो इमान्दार र निष्ठावान अधिकृतले राज्यप्रति नागरिकको विश्वास बढाउन महत्वपूर्ण भूमिका खेल्दछन्।”
डिएसपी बस्यालको प्रतिक्रिया
सम्मानपछि संक्षिप्त प्रतिक्रिया दिँदै डिएसपी बस्यालले भने, “यो सम्मान मेरो मात्र होइन, सम्पूर्ण प्रहरी टोलीको हो। म अझै पनि कर्तव्यनिष्ठ भएर समाजमा शान्ति र सुरक्षा कायम राख्न प्रतिबद्ध छु।”
उनको यो सम्मानले जिल्लाभरिका प्रहरी कर्मचारीमा पनि थप उत्साह र जिम्मेवारीबोध जागृत गराएको बताइएको छ।
