श्रीमानसँगको विवादपछि काठमाडौंको म्हेपी रानीबारीस्थित खोलामा हाम फालेकी एक महिला बेपत्ता भएकी छिन्। शनिबार अपराह्न सवा ४ बजे भएको घटनामा उनका श्रीमानको भने सकुशल उद्धार गरिएको छ।
जिल्ला प्रहरी परिसर काठमाडौंका प्रवक्ता, एसपी पवन भट्टराईका अनुसार, लगातारको वर्षाले बढेको खोलामा रितु रोका र उनका श्रीमान श्याम बुढाथोकीले हाम फालेका थिए। उनीहरू हाम फालेको देखेपछि स्थानीय अमन टुन्चिङ मगरले खोलामा पसेर श्यामलाई बचाउने प्रयास गरेका थिए।
तर, खोलाको तीव्र बहावले श्याम र अमन दुवैलाई बगाउन थालेपछि प्रहरीले उनीहरूको उद्धार गरेको थियो। उपचारका लागि पिपल्स अस्पताल लगिएका दुवै जना डिस्चार्ज भइसकेका छन्। बेपत्ता रितु रोकाको भने प्रहरीले खोजी कार्य जारी राखेको एसपी भट्टराईले जानकारी दिए।
