अर्जेन्टिना र इजिप्टको खेलमा रेफ्रीको निर्णयलाई लिएर विश्वभर विवाद

फिफा विश्वकप २०२६ को अन्तिम-१६ अन्तर्गत मंगलबार भएको अर्जेन्टिना र इजिप्टबीचको खेल निकै रोमाञ्चक रह्यो। २-० ले पछि परेको अवस्थालाई उल्टाउँदै अर्जेन्टिनाले ३-२ को सानदार जित त निकाल्यो र क्वार्टरफाइनलमा पनि पुग्यो तर अहिले जितको भन्दा बढी चर्चा रेफ्रीको निर्णय र VAR को भूमिकालाई लिएर भइरहेको छ। खेल सकिएपछि विश्वभर नै यस विषयमा चर्को बहस सुरु भएको छ।
खेल सकिएलगत्तै इजिप्टका प्रशिक्षक होसाम हसनले पत्रकार सम्मेलनमै आफ्नो आक्रोश पोखे। उनले आफ्नो टोलीमाथि सरासर “अन्याय भएको” भन्दै रेफ्रीका गलत निर्णयहरूले गर्दा नै खेलको नतिजा बदलिएको आरोप लगाए। मैदानमै पनि इजिप्टका खेलाडीहरूले रेफ्रीको निर्णयको कडा विरोध गरेका थिए।
खेलका ती ३ विवादास्पद निर्णय, जसले बहस निम्त्यायो:
इजिप्टको गोल रद्द (VAR को निर्णय): इजिप्ट १-० ले अघि भइरहेका बेला मोस्तफा जिकोले अर्को उत्कृष्ट गोल गरेका थिए। तर, VAR चेक गरेपछि रेफ्रीले गोल हुनुअघि अर्जेन्टिनाका खेलाडीमाथि फाउल भएको भन्दै त्यसलाई मान्यता दिएनन्। यो निर्णयलाई लिएर सामाजिक सञ्जालमा पूर्व खेलाडी र फुटबल विज्ञहरू दुई धारमा बाँडिएका छन्। धेरैले यो निर्णय निकै कडा र अन्यायपूर्ण भएको बताएका छन्।
पेनाल्टी नदिइनु र काउन्टर गोल: खेलको अन्तिम समय (इन्जुरी टाइम) मा इजिप्टका स्टार खेलाडी मोहम्मद सलाहलाई अर्जेन्टिनाको पेनाल्टी एरियामा लडाइँदा पनि रेफ्रीले पेनाल्टी दिएनन् र VAR ले पनि यसमा केही बोलेन। झन् लगत्तै अर्जेन्टिनाले काउन्टर अट्याक गर्दै निर्णायक गोल गरिदियो। यही घटनाले इजिप्टका समर्थक र खेलाडीलाई सबैभन्दा बढी आक्रोशित बनाएको छ।
रेफ्रीको एकतर्फी व्यवहारको आरोप: खेलभरि नै रेफ्री फ्राँस्वा लेटेक्सियरका साना-तिना निर्णयहरू अर्जेन्टिनाको पक्षमा बढी गएको भन्दै सामाजिक सञ्जालमा उनको निकै आलोचना भइरहेको छ। यद्यपि, फिफाले अहिलेसम्म रेफ्रीको निर्णय गलत भएको वा कुनै तलमाथि भएकोबारे आधिकारिक रूपमा केही भनेको छैन।
अब के होला?
खेलपछि निकै निराश बनेका इजिप्टका प्रशिक्षक हसनले आफूहरूमाथि ठूलो अन्याय भएको र अब आफूले विश्वकपका बाँकी खेलहरू नै नहेर्ने सम्मको आक्रोश पोखेका छन्। अन्तर्राष्ट्रिय मिडियाका अनुसार इजिप्ट फुटबल संघले यो विषयलाई लिएर फिफासमक्ष औपचारिक रूपमा उजुरी दिने तयारी गरिरहेको छ।
यो घटनाले विश्व फुटबलमा फेरि एकपटक प्रविधि (VAR) को सही प्रयोग र रेफ्रीहरूको निष्पक्षतामाथि ठूलो प्रश्नचिह्न खडा गरिदिएको छ। धेरै फुटबल प्रेमीहरूले यस्ता विवादास्पद निर्णयले खेलको साख गिराउने चिन्ता व्यक्त गरेका छन्। तर अहिलेसम्म खेलमा जानीजानी पक्षपात वा म्याच फिक्सिङ भएको कुनै प्रमाण भने फेला परेको छैन।

अब के होला त ?