काठमाडौँ । मुम्बई डुंगा दुर्घटनामा मृत्यु हुनेको संख्या १५ पुगेको छ । मृत्यु हुनेमा आठ पुरुष, चार महिला र तीन बालबालिका रहेका छन् । यस दुर्घटनामा दुई जना अझै बेपत्ता छन् ।
गत बुधबार भएको दुर्घटनाको जानकारी दिँदै महाराष्ट्रका मुख्यमन्त्री देवेन्द्र फडणवीसले दुर्घटनामा यस अघि १३ जनाको मृत्यु भएको बताएका थिए । उनले मृतकका परिवारलाई ५/५ लाख रुपैयाँ आर्थिक सहयोग गर्ने घोषणा समेत गरेका थिए ।
प्रधानमन्त्री कार्यालयले मृतकका परिवारलाई प्रधानमन्त्री राहत कोषबाट दुई लाख रुपैयाँ आर्थिक सहयोग गर्ने घोषणा गरेको थियो । त्यस्तै घाइतेलाई ५० हजार रुपैयाँ सहयोग गरिने बताएको थियो ।
नौसेनाको स्पीडबोट फेरीसँग ठोक्किएपछि यो दुर्घटना भएको थियो । यो डुंगा मुम्बईको गेटवे अफ इन्डियाबाट एलिफेन्टा आइल्याण्ड जाँदै थियो, जसमा करिब ८० जना सवार थिए ।
