एजेन्सी । लेबनानमा पछिल्लो २४ घण्टाभित्र भएका इजरायली आक्रमणमा कम्तीमा ३५ जनाको मृत्यु भएको छ। लेबनानी स्वास्थ्य मन्त्रालयका अनुसार दक्षिण र पूर्वी क्षेत्र लक्षित आक्रमणमा दर्जनौँ घाइते भएका छन्।
इजरायल र लेबनानबीच तनाव चरम अवस्थामा पुगेका बेला तथा अन्तर्राष्ट्रियस्तरमा वार्ता प्रयास भइरहेका समयमा यस्तो ठूलो मानवीय क्षति भएको हो। इजरायलले इरान समर्थित हिजबुल्लाहलाई लक्ष्य बनाउँदै करिब छ सातादेखि सैन्य कारबाही जारी राखेको जनाएको छ।
उपलब्ध तथ्यांकअनुसार मार्च २ यता भएका आक्रमणमा लेबनानमा हालसम्म २,१२४ जनाको ज्यान गइसकेको छ, जसमा बालबालिका र स्वास्थ्यकर्मीको संख्या उल्लेखनीय रहेको छ।
यसैबीच, इजरायली सेनाले दक्षिण लेबनानको बिन्त जबेल क्षेत्रमा आफ्ना केही सैनिक घाइते भएको पुष्टि गरेको छ। सो क्षेत्रमा हाल स्थल कारबाही पनि तीव्र पारिएको जनाइएको छ। सेनाका अनुसार एक बटालियन कमाण्डरसहित तीन सैनिक गम्भीर घाइते भएका छन्।
मानवीय संस्थाहरूले भने नागरिक बस्ती र स्वास्थ्य संस्थामाथि आक्रमण भइरहेको भन्दै गम्भीर चिन्ता व्यक्त गरेका छन्। Doctors Without Borders ले यसलाई मानवअधिकार उल्लंघनको गम्भीर घटना भन्दै तत्काल आक्रमण रोक्न आग्रह गरेको छ।
