रुसको अमुर क्षेत्र नजिकै हराएको अंगारा एयरलाइन्सको एएन–२४ विमान दुर्घटनाग्रस्त अवस्थामा फेला परेको छ। विमान गन्तव्यभन्दा करिब १६ किलोमिटर टाढा दुर्घटना भएको पुष्टि गरिएको छ।
रुसी आपतकालीन मन्त्रालयका अनुसार, विमानमा ४३ जना यात्रु र ६ जना चालक दलका सदस्य, जसमा ५ जना बालबालिका पनि थिए, सवार थिए। विमान ब्लागोवेशचेङ्कबाट उडान भरेर चीनको सीमावर्ती क्षेत्र नजिक रहेको टिंडा विमानस्थल पुग्नै लाग्दा रडारबाट सम्पर्कविहीन भएको थियो।
दुर्घटनापछि उद्धारकर्मीहरू सक्रिय रूपमा परिचालित भएका थिए। हेलिकप्टरबाट जलेको विमानको संरचना देखिएपछि घटनास्थल पहिचान गरिएको हो। कोही पनि जीवित भेटिने सम्भावना अत्यन्तै न्यून रहेको अधिकारीहरूले जनाएका छन्।
अमुर क्षेत्रीय गभर्नरले घटनास्थलमा सबै आवश्यक उद्धार टोली पठाइसकेको जानकारी दिएका छन्।
