काठमाडौं । ड्युटी सकेर घर फर्किँदै गरेका ट्राफिक प्रहरी इन्स्पेक्टर अभय लामा सडक दुर्घटनामा परी गम्भीर घाइते भएका छन्।
गएराति करिब ११:१५ बजे तारकेश्वर नगरपालिका–८, डाँडागाउँस्थित सडकमा भएको दुर्घटनामा मोटरसाइकलमा सवार लामालाई ट्रकले ठक्कर दिएको प्रहरीले जनाएको छ। बागमती प्रदेश ०२-०२९ प ९४१५ नम्बरको मोटरसाइकललाई विपरीत दिशाबाट आएको बागमती प्रदेश ०३-००१ ख १७१५ नम्बरको ट्रकले ठक्कर दिएको हो।
दुर्घटनापछि घाइते लामालाई तत्काल उद्धार गरी त्रिवि शिक्षण अस्पताल लगिएको थियो। त्यहाँ प्रारम्भिक उपचारपछि थप उपचारका लागि बीएण्डबी अस्पतालमा रेफर गरिएको प्रहरीले जानकारी दिएको छ।
दुर्घटनामा संलग्न ट्रक चालक मकवानपुर मनहरी–५ निवासी ३८ वर्षीय राम मोक्तानलाई प्रहरीले नियन्त्रणमा लिई थप अनुसन्धान अघि बढाएको जनाएको छ।
