ओखलढुङ्गामा एमालेबाट उम्मेदवार बनेका मिलन कुमार विष्टलाई अदालतले पक्राउ गर्न आदेश दिएको छ । लिखु गाउँपालिकामा उम्मेदवार बनेका विष्टविरुद्ध अदालतले पक्राउ गर्न अनुमति दिएको हो ।
जिल्ला अदालत भक्तपुरबाट ठगी र किर्ते मुद्दामा पक्राउ पुर्जी जारी भएको जिल्ला प्रहरी कार्यालयका ओखलढुङ्गाका एक अधिकृतले जानकारी दिएका छन् ।
विष्ट विरुद्ध जिल्ला प्रहरी कार्यालय ओखलढुङ्गामा दोहोरो नागरिकता लिएको बारे जाहेरी पनि परेको छ । काठमाडौं जिल्ला प्रशासन कार्यालय र मिलन कुमार विष्ट र ओखलढुङ्गा जिल्ला प्रशासन कार्यालयबाट होमबहादुर विष्टको नाममा दोहोरो नागरिकता लिएको जाहेरीमा उल्लेख गरिएको छ ।
विष्ट विरुद्ध दोहोरो नागरिकता सम्बन्धी कसुरमा जाहेरी आएको र त्यसबारे अनुसन्धान भइरहेको ओखलढुङ्गाका डिएसपी सुकदेव खनालले जानकारी दिए ।
